對於鳳樓劏房吞併旺區舊樓，油尖旺區議員許德亮坦言：「小業主根本做唔到啲乜！現行冇一條法例可以堵塞劏房呢個漏洞，鳳樓搞手只要申請小型工程牌照，兩三日就搞掂所有工程，以避免屋宇署巡視，向法團投訴都嚟唔切，加上對方來自三山五嶽，小業主點樣對抗？」
女住客被問價
香港業主會會長佘慶雲亦指出，鳳樓劏房吞食大廈的求助多不勝數，「女住客話日日返屋企俾人上下打量，有時仲開口問價，好困擾」。但實際她們只能無奈忍受，因為要阻止「劏房一樓一」只能利用僭建條例取締，無論向甚麼部門投訴，最終只會碰上屋宇署這道鐵板。
「我哋有個『四門理論』，就係查詢無門、諮詢無門、投訴無門，同埋求助無門，因為最後都係要等屋宇署做嘢，但屋宇署廿年嚟都係話資源不足，人手唔夠，只能依次清拆，但永遠都唔見佢做嘢！」他舉例曾以阻塞走火通道向消防處投訴，但處方只會推說是屋宇署職責。
佘慶雲直言問題相當棘手：「投訴業主立案法團都冇用，因為佢哋已經俾經營緊鳳樓嘅業主主導，點會倒自己米？」
《蘋果》記者