曾志豪這小子真不知死活，其包容內地同胞論辣㷫陳雲、陶傑及一眾本土派網民，一波未平，最近又在專欄「請教李怡前輩」，指正前輩1996年嘉利大廈火災時，彭定康並非第二天才到達現場，而是當晚已經到場視察災情。他即將舉行的棟篤笑，又會否到處辣火頭？ 記者：周燕 攝影：譚盈傑
捂良心說話＝鬼上身！
在同一份《蘋果日報》，曾志豪與李怡分別在〈名采〉與〈論壇〉展開罵戰，曾小子直問前輩是否為證明「梁振英到醫院探望（南丫島海難死傷者）是抽水」而擺彭督上枱，李怡則回應：「稱我前輩愧不敢當，我哪有這樣德性的後輩？」這樣的回應，也夠他背脊凉一凉吧？曾小子快將開棟篤笑，得罪梁振英事小，與網民為敵事大，不如趁機投本土派網民所好，一笑泯恩仇？他說：「如果要我講呢啲說話，我先要做一場法事，將自己搞到鬼上身，因為除乩童外，無人可以用自己肉體講出唔係自己相信嘅說話。」拍檔陳嘉銘獻計：「我諗到條橋，你想批評本土派網民嘅說話，由我講，然後你負責兜番。」曾志豪的棟篤笑有即興表演環節，讓觀眾考考他倆才藝，我順道起題，要他想個Gag來回應李前輩，要知道，搞棟篤笑的人最會自嘲，最不怕拿自己弱點來開玩笑，誰知他耍手擰頭：「我篇文章係針對件事，唔係針對人。」
今年四月，agnès b.將軍澳分店的餐牌使用簡體字和內地用詞，引起網民不滿，曾志豪偏偏力排眾議：「提供簡體字，等於法庭提供外語繙譯服務一樣，只為方便溝通，並非表示熱愛同擁抱某種語言。」陳雲罵他賣港賊、曾賊，陶傑在《爽報》狠狠再插一刀：「揮劍自宮，是你自己的自由，不要游說或脅迫香港人跟你一樣做太監。」今次又敢指正李怡前輩，是否膽子大過頭？曾志豪一臉無奈：「估唔到指出一個錯誤，睇嘅人一啲都唔覺寫錯事實係唔啱，反而會話：『你做乜話人喎？』《國王的新衣》呢個童話原來係錯嘅，周邊啲人會話：『你個仔做乜話人無着衫？』」拍檔陳嘉銘說：「我試試從李怡角度諗，你呢個仔笑我無着衫，態度又唔好，又寸寸貢，我覺得唔係好順囉。」
不罵敵人＝投共！
體諒包容內地同胞的言論在網絡世界最惹火，高登仔呼曾志豪是「五豪子」，譏笑他是五毛打手，還怕不怕辣㷫網民？「高登仔係好神奇嘅社群，當我有文章Hit中佢哋口味，例如關於笑大陸嘅嘢，佢哋有啲人會話：『佢是否黐線、精神分裂？』有啲人會讚我講得好，有啲人又會話：『佢之前係包容論㗎喎。』網民可能都唔知自己應該賜酒、派膠定係食花生。我唔怕與網民為敵，反而驚佢哋唔睇我表演。」
經歷多次被人狠批，曾志豪坦言現在表態也有考慮，「寫關於中港矛盾嘅文章，我會猶豫應唔應該繼續表達意見同堅持自己想法。我覺得好攰，無論講乜都被人歸納為別有用心，被指隱形梁粉同左膠。」中港矛盾有理說不清，恩怨是對立面，也是一體兩面，恩怨越大表示彼此關係越糾纏不清，陳嘉銘也不無感觸：「香港嘅失去理智、狂躁、瘋狂持續放大，一個餐牌有簡體字已經鬧得咁緊要，梁振英出嚟慰問傷者就覺得佢做騷，李剛喺電視講幾句就覺得佢進佔香港。太多嘢驚，驚到已經失去理智。」曾志豪感慨：「香港失去以前嘅自信，變得好陌生。以前香港人實事求是、理性，跟大陸相比，我覺得呢啲係香港優勝之處。左派好鍾意上綱上線，不理性攻擊民主派，我哋家似乎用緊相同伎倆，不斷尋找敵人，好似連上帝都無辦法證明自己唔係投共，如果唔用最惡毒嘅說話鬧敵人，你已經有投共嫌疑。」香港人的神經兮兮，是日積月累而來的，曾志豪說：「冰封三尺非一日之寒，中聯辦干預之手唔係今日先伸出嚟，唔可能一味話香港人黐線，你要明白，係環境逼到香港人黐線。」
撤、擱置＝跣？
黃子華、詹瑞文，連喬寶寶都搞棟篤笑，老實說兩位有甚麼賣點？曾志豪謙虛地說：「我哋已經朝聖，睇咗黃子華嘅極級棟篤笑，好彩佢近年轉型，個騷只有頭十分鐘觸及香港最Hot嘅政治題目，譬如國教、陳茂波、李旺陽，好好笑，其他大部份內容都唔講政治，畀番條生路給有志者，即係我哋。」陳嘉銘說：「我哋個棟篤笑叫《國民跣低教育》，香港人長年累月都俾議員、政客、中國、英國跣緊，喺政治層面無發聲機會。」1982年，戴卓爾夫人與鄧小平在北京人民大會堂就香港問題談判，夫人步出大會堂時跣了一腳，這一跣，像預視香港人此後的命運，所以命題中的「跣」字是精要所在。曾志豪說：「好似回歸咁吖，你話係一張地毯，等人行得舒服，定係一塊蕉皮，跣到人攤攤腰？又好似國教事件，如果唔係有人察覺到嗰個指引同埋本小冊子，我哋可能俾人跣好耐咯，家又出現『撤』和『擱置』呢類字眼，係唔係又準備跣多我哋一次？」
大家都記得《頭條新聞》的小豪子吧？這次棟篤笑是否小豪子借屍還魂？曾志豪說：「小豪子最大特色唔係着清裝，佢有太后做主炮手，只匿喺太后身後面抽吓水，我負責喺旁邊煽風點火，但呢次棟篤笑唔同，我要企喺最前線，同拍檔並排演出。」
梁班子＝惹笑！
論觀眾認知度，陳嘉銘不及曾志豪，他在中大文化及宗教研究系當兼職講師，也有多次棟篤笑經驗，看他斯斯文文，有本事搞笑嗎？「棟篤笑特質係精神分裂，正如有些家長、社運老骨本來唔上街，但佢哋始終走出嚟。棟篤笑表演者得到一個舞台，就有自己嘅位置，就可以盡情發揮，棟篤笑就有呢個爆發點。」從來拍檔賣藝，總有上下把位之分，他們也有吧？曾志豪說：「我哋睇落似一個蝦人，一個俾人蝦，但俾人蝦嗰個，一個回馬槍，又可以拮到你一頸血。」陳嘉銘不無自信：「唔一定多人識嗰個就係上把，無人識嗰個就要企後面，到真正演出，觀眾就會感受到我哋嘅合作。」曾志豪說：「就好似梁振英同李剛，一個成日見樣，但未必代表佢話事，一個唔係成日企出嚟，但一出嚟大家都Feel到佢嘅勢力。到底邊個先係皇帝？你話唔準。」
一個是電視人，一個是劇場人，各有優點，曾志豪說：「我跑短途，爆發力強，習慣每三秒拋一個Gag，因為我喺電視節目可能只有分半鐘表演時間。佢係細水長流式，跑長途，講持久力，要琢磨幾行字，有鋪排先彈出一個笑點。做《頭條新聞》，吳志森比我更心急，佢講對白好直接，唔兜圈，做到一針見血，但同嘉銘合作，我會諗點樣去得盡啲，佢就考慮點樣修飾。」
雖然梁振英只上任四個月，但夠他們拿來玩了，「相比董伯伯、曾蔭權，梁振英唔係特別好笑，但佢個班子最好笑，一個陳茂波都贏晒，董、曾班子出事，多數同政策有關，但梁班子出事卻衰喺私德。」梁振英說話滴水不漏，有甚麼笑能搞得出？陳嘉銘說他好笑之處就在滴水不漏：「好似金句『撤回與不撤回之間，有好大討論空間』，家好多人都模仿佢咁樣說話。」
《國民跣低教育》
地點：上環文娛中心劇院
演出日期及時間：11月9日至10日8:00pm、11月10日3:00pm
票價：$150、$180
查詢：5188 0969（譚先生）
