香港人有幾鍾意滾？睇飲食網站為火鍋設專頁，連鎖食肆爭住開火鍋店就知！近年已不滿足於打邊爐，改戰水煮魚同重慶辣雞煲，戒不掉「烚下烚下」鋪癮，但只限深圳河以南，自從強國名產地溝油面世，水煮魚不敢碰，我等「滾友」到北京公幹例食的「海底撈」亦過門不入！
早排強國電視台播《舌尖上的中國》熱爆，就知炎黃子孫幾咁為食，但地溝油一日未杜絕，美食天堂遲早變地獄。地溝油打之不盡，食油價格反而越升越有，今年美國、俄羅斯等地旱災搶高糧食價格，花生油一馬當先，內地5升裝花生油半年內加了20幾蚊人仔，漲幅有兩三成。
中國糧油（606）中期純利跌69%至5億元，整體毛利率由10.8%降至6.3%，加上阿爺早前對食油價格到實，股價一直死氣沉沉。不過瑞銀上周唱好，話食油價格升幅可抵銷進口大豆的成本壓力，有助改善末季毛利，仲有廉價大豆庫存，利好下半年業績。瑞銀一推即爆升8%，睇嚟中糧油就快滾起。
Samantha
本欄逢周一、三、五刊出