《蘋果日報》馬經版影到梁特首在快活谷馬場「名譽會長廂房」與中華廠商會高層一齊睇跑馬，左丁山認為係好事，賽馬係香港最大娛樂體育慈善事業，製造廣大就業職位，每年繳交博彩稅過百億元，足以支撐不少特區政府嘅派糖措施，梁特首係應該深入馬場，了解吓啲群眾真實生活嘅。以前曾特首、許司長間中有利用「名譽會長廂房」，請過傳媒人及議員一齊吃晚飯兼睇跑馬，左丁山參加過，在座眾多人士之中，三分二以上不識睇賠率與填飛，證明佢地對賽馬好外行，偏偏呢班人偶有機會就會向馬會抽水，批評多多，例如助長賭風之類，其實佢地不知賽馬為何物。
跑日馬在星期日下午，時間比較長，而且星期日好多人有不同節目，特首去馬場係有難度嘅。星期三夜馬就最好嘞，夜晚放工之後，大家都要食晚飯嘅啦，由政府總部去快活谷又容易，七時準時到達，九時半左右可以送客，馬會廂房嘅環境又好，食物又正，除咗講吓馬之外，特首有大把時間推銷政策，爭取支持，唔係淨係商界議員商家係座上客呀，特首一定會在不同時段招呼埋工會代表，社福界人士，寓政治於娛樂，拉票在無形之間，故此有心水清人士估計，梁先生好快就會發覺在星期三晚上於馬場請客，省時省力，公關效用宏大，今個馬季會成為馬場常客。
馬場政治公關還有一個好處，名譽會長廂房與董事廂房為鄰，董事房內有若干VIP可以在走廊外有意無意之間，與特首打個招呼，以講馬為名，講番幾分鐘「正經事」，大家心領神會，意在不言中，呢條橋好多年前英國人已經諗到，戴麟趾總督更加係馬主嚟。
賽馬而享有社會高格調地位，在亞洲地區之中，香港第一。新加坡樣樣嘢與香港爭，近十年大興土木，大舉填海，即時可動用土地儲備多過香港好多；甲級寫字樓又多又靚，租金又便宜，將不少跨國公司亞洲總部或者後勤總部搶晒過去，不少香港叻仔叻女要到新加坡返工（因香港搵唔到寫字樓）。但在賽馬方面，新加坡商人仍然唔敢多去馬場，做咗馬主都唔敢現身拉頭馬，此則與香港差得太遠了，梁特首頻頻在馬場出現，會確保香港在呢方面保持第一位。