英國資深外交官科爾茲（Sherard Cowper-Coles），兩年前離開外交部，最近寫書爆料，仲喺《星期日泰晤士報》連載。原來86年底港督尤德爵士突然病逝，英國外交及聯邦事務部準備嘅繼任人名單中，王儲查理斯排喺首位㗎，緊隨其後係英國十大富豪之一嘅大地產商西敏公爵格羅夫納（Gerald Grosvenor）。
戴卓爾揀衞奕信
名單據講係由當時嘅首相戴卓爾夫人要求擬備，但佢最終都係揀咗人稱「中國通」嘅衞奕信接棒。如果87年到港履新嘅係查理斯，相信佢會帶埋戴安娜王妃同兩位小王子入住港督府，想同舊情人卡美拉藕斷絲連都冇咁方便，而戴安娜嘅人生故事，可能亦要改寫。查理斯同戴安娜最終喺96年離婚，查理斯97年6月30日單拖來港主持英方告別儀式，代英女皇致告別辭。