「鼠戰中環」踏入第七年，50幾隊參賽隊伍成400幾人，噚日個個着到鬼五馬六、揸住個公事包喺中環區跑接力賽，當中自然唔少得由議員同傳媒成組嘅隊伍。
裙拉褲甩跌眼鏡
民主黨涂謹申同莫乃光以大力水手look落場。平時文質彬彬嘅法律界郭榮鏗就扮巴斯光年，佢哋夥拍三位記者同兩位港台DJ出賽。
可能平時少運動，佢哋喺過程中不斷被爬頭、又跑到裙拉褲甩跌眼鏡；去到尾二嗰棒，果真跑尾二，肩負最後一棒重任嘅莫乃光，眼見企喺隔籬、同佢一樣苦苦等待最後接力嘅科大女生好心急，非常gentleman咁等埋佢先起步，仲喺終點前讓賽，用拉布形式等埋科大女生先衝線。Charles選舉時已有「色戒」事件，估唔到今次同樣難敵美人關；雖然包尾收場，但就獲頒個「最具鼠戰精神獎」做安慰獎。