恒指上周五收市成功突破7月初形成嘅上升通道阻力，後市更加利好，升勢理應暢通無阻，預計整個第四季都係大漲小回格局。由於本地地產股要唞唞氣，所以破位後港股上升動力要靠中資股，當中建設銀行（939）成功突破頭肩底頸線，睇量度升幅點都去到6蚊，絕對可以幫補一下大市強勢。
至於第四季買乜好？晉佳依然認為最緊要揸實基金重倉股，因為年尾跑數就係靠佢哋，個市好，唔炒上就奇！惠理基金之前重注買正通汽車（1728），最多買到去12%，家減持至11%樓下，不過仍然好重倉，只要基本因素冇問題，惠理基金肯定要利用佢為年尾跑數。
汽車代理股正通，本身以致旗下中汽南方都唔點賣日系車，所以中日釣魚島紛爭之中，對佢其實冇乜影響。至於正通嘅招牌貨寶馬，內地直頭打橫行，雖然經濟環境唔好，銷情依然強勁。寶馬10月4日講過，寶馬同MINI品牌汽車9月份喺內地銷量升59%，達29631輛，仲要多過頭9個月嘅每月平均數26340輛，反映華晨中國（1114）以至正通，都係釣魚島事件嘅受惠者。
寶馬賣得，正通去存庫嘅情況可能得以改善，有助財政狀況，加上新賣寶馬所帶嚟嘅售後服務收入，又會滯後一段時間，令往後收入急增。
售後服務毛利飆利業績
單睇今年上半年，售後服務毛利增長1.58倍至4.74億元人民幣（計及中汽南方貢獻），已經佔整體毛利四成，回顧近期寶馬銷售數據，都可以肯定售後服務收入會大幅度膨脹，至於寶馬好賣之餘，打折亦唔多，相信賣車毛利率都冇乜下跌，今年業績隨時爆靚！股價肯定未反映。
睇番股價技術走勢，正通做咗圓底之後，喺頸線附近爭持咗接近一個月，上周五喺4.80元附近有支持，成交亦增加，低位出現錘頭，似乎有番啲支持。現價可以買定，坐貨到年底，博股價上番7蚊阻力位，即係博佢上得番惠理嘅打和價。
至於惠理集團（806），喺4蚊樓下嘅密集阻力區爭持咗一段日子，上周五股價上升3%，配合成交增加，睇怕破4蚊係遲早嘅事，亦可當佢係恒指變倍器，值得考慮買入持有。
晉佳
本欄逢周一、三及五刊出