黎明（Leon）同樂基兒（Gaile）嘅四年婚姻玩完，一向愛蒲愛玩嘅Gaile有傳為咗迫Leon承認離婚，之前不停喺Instagram貼出一大班男女蒲友去玩嘅相片，被指為Gaile老外小三嘅Cuz仲貼咗唔少同Gaile一齊嘅相，當中仲有疑似女方着內褲攬狗床照，結果成功迫Leon發聲明承認離婚。計仔得逞後，Gaile自從呢個月4日晚貼咗張同三個女仔朋友食飯嘅相之後，一直喺Instagram潛水冇蒲頭，相隔九日，一直熱愛貼相嘅Gaile終於忍唔住，噚日貼咗兩張新相，第一張係佢揸住塊滑浪板行沙灘，悠然自得好鬼嘆，Gaile留言話：「Beach lover。」跟住Gaile再貼張有男有女嘅朋友相，一眾人玩得相當開心。
黎明賺人仔
雖然Gaile冇交代自己身在何處，同埋相中唔見疑似新歡Cuz，但就咁睇相都知Gaile玩得好開心，真係一啲都唔似啱啱宣佈同Leon離婚。至於Leon近日除咗喺香港之外，日前亦返內地做嘢，一個做一個玩，果然係兩個世界嘅人。