曾經批評本《中國模式》唔掂，暗示連累到教育局嘅教育局局長吳克儉，早前終於喺民意壓力下「擱置」國民教育科指引。噚日佢出席公開活動，被問到有議員動議要求佢落台時，話用平常心看待；短短33秒「扑咪」，竟然用咗多達13個「呢」，真係委屈到「呢」。呢13個「呢」點嚟？查實佢係咁講「呢」：「整體嗰個宣佈措施，出咗嚟之後呢，跟住呢，一路都係冇事。直至到七月初開始，係有好多其他嘅意見，特別一個呢、好不幸，嘅一份呢，坊間嘅文件出現咗呢，引起大家嘅恐慌，呢個我哋了解。」聽完咁多個「呢」，大家有冇同八方一樣頭暈呢？