上周六嘅非國盃外圍賽第2圈次回合，塞內加爾主場對科特迪瓦，爭出線資格。科特迪瓦首回合贏4:2，次回合亦領先2:0；之後塞內加爾球迷騷亂，迫使賽事被腰斬，但相信非洲足協好大機會判科特迪瓦贏波出線。呢件事嘅最大得益者，可能係紐卡素領隊柏度，因為佢嘅塞內加爾雙煞丹巴巴亞同柏比斯施斯，下年1月都唔使踢非國盃。
球迷衝入場想打杜奧巴
場波喺塞內加爾首都達喀爾舉行，科特迪瓦喺51分鐘打開紀錄；杜奧巴處理禁區頂嘅罰球，射穿人牆入網。對於塞內加爾球迷嚟講，入波嘅杜奧巴當然係最大仇人；喺65分鐘，就有個球迷走咗落場，發狂咁衝向杜奧巴，好似想打鑊佢咁，唔理佢夠唔夠「巴哥」打，呢位球迷出手前就俾保安制伏咗。
呢件小風波之後，場波繼續，踢到70分鐘，科特迪瓦博到個具爭議性嘅12碼；杜奧巴一於少理，主射入網，幫球隊領先2:0，總比數為6:2，出線在望。不過，呢個12碼就引起主隊球迷騷動，向球場掟雜物，又喺看台縱火。球證喺73分鐘中止比賽，球員同作客嘅球迷都被迫喺中圈聚集，要由防暴警察以盾牌組成保護牆，護送離開；據報，當地警方更加出動催淚氣體平息騷亂。事後，曼城代科特迪瓦嘅托尼兄弟向外界報平安：「呢單發生喺塞內加爾嘅騷亂入面，我哋嘅高路同耶耶托尼都安全。」
球賽被腰斬，雖然非洲足協未公佈裁決，但無論從當時比數，定係由事故責任嘅角度去睇，都好大機會判科特迪瓦出線決賽周。睇到家呢個情況，唔係黑心，但紐卡素領隊柏度應該揞住嘴笑緊；因為佢嘅兩位正選前鋒丹巴巴亞同柏比斯施斯，下年1月英超賽程頻密時，都唔使返去踢太公波，可以專心幫球隊比賽。
另外，利物浦睇中丹巴巴亞嘅違約金只係700萬鎊（約8,700港元），諗住喺1月買人；家丹巴巴亞唔使踢非國盃，相信紅軍領隊羅渣士都好有可能出手。
