基金瘋搶中資股，無非都係為年底交數，保住飯碗，目標除中資金融股外，具復蘇概念的股份將最受惠。本欄上周先後推介玖紙（2689）及鞍鋼（347），過去兩年兩股均受產能過剩、成本上漲等困擾，業績一落千丈，但阿爺加快行業整合，淘汰落後產能，兩者龍頭地位將更穩固，只要內地經濟反彈，升幅可以好驚人，有貨不妨坐多陣。
魏力上周五提到，衰足兩年的體育用品股見轉勢迹象。困擾行業的存貨、品牌定位及定價問題相信目前已全面反映。李寧（2331）財務總監「跳船」，市場卻憧憬「企業救星」私募基金TPG會派人入局，幫手搞好盤數。經驗所得，壞消息當好消息炒，反映股價九成已見底，相信明年行業有望復蘇。
今日介紹隻殘到爆、但勁多Cash的中國動向（3818）。09年勁賺14.6億人仔，毛利率60%。兩年後純利暴瀉九成，全年僅賺1億人仔，毛利率得47%，主因割價清存貨所致。但美林報告認為，公司今年可大致清完存貨，有利明年毛利率回升，加上每股淨現金達1.10元，係現價0.88元1.25倍，業務完全免費附送！
中動向上周五以大成交突破0.85元阻力，MACD勢重現雙牛可追入，短線先睇250日線1.08元。
魏力
http://www.facebook.com/2012jason