港隊噚日已經開始集宿，為聽晚響旺角場友賽馬來西亞做最後備戰，不過，教練摩力克希望港隊首席前鋒陳肇麒歸隊嘅希望就落空；呢位外流中甲廣東日之泉嘅球星繼續玩「失蹤」。
摩帥噚日響青衣東北公園帶完操後話，足總呢兩日不斷聯絡廣東日之泉，又試過致電陳肇麒，但都冇人聽；有傳肇麒有傷，亦有話係球會唔想佢踢，以免受傷影響淨番兩場嘅中甲護級戰。不過有球迷報料，話喺銅鑼灣見到陳七同女友行街喎。
計求大俠話，球員友賽前退隊就經常有，但使唔使唔聽電話玩失蹤？摩帥亦接受現實，話可以趁機睇吓其他球員喺國際賽嘅表現，順便為往後賽事作準備。馬來西亞噚日亦已抵港，今晚會響旺角場晚練。