到底一個女人點樣打扮，先至稱得上「靚」呢？八方覺得各花入各眼，好難有個統一嘅標準。身兼平機會主席嘅行政會議召集人林煥光，個人喜好就較獨特。佢噚日出席一個有關同性戀及變性人婚姻權利嘅座談會時，被問到何謂「美」？佢笑笑口話當年拍拖，女友亦即是家嘅林太唔多着裙，但又怕佢唔鍾意，都忐忑過一輪。但查實林太嘅擔心係多餘，因為林煥光自爆鍾意男仔頭，尤其好鍾意女仔着男裝，作中性打扮，所以林青霞做《東方不敗》時，佢自己都like爆㗎。講完一大輪，林煥光都係要老套咁講句：其實一個人只要心地善良，點打扮都係好靚喎。