講開上市公司主席衣着，好多內地民企上市公司老闆來港上市前，由頭到腳都要俾專人執一執，先似番個上市公司老闆，唔係話要周身名牌西裝咁誇張，但點都要着得四正，同埋記得剪走個牌子。
聽老婆話出晒事
聽聞早幾年有位民企上市公司主席，平日衣着簡單，多數着短袖恤衫，湊呢個客嘅賓架不時提醒主席，出席記者會同投資者會議時，記得着普通黑色西裝、白色或藍色恤衫，咁就一定唔會出事，主席一直相當聽話。
點知去到公司上市當日，主席竟然扮劉德華成個白馬王子咁出現，一套白色西裝加條紅運當頭咁嘅紅色領帶，大家見到跌晒落地。原來主席喺上市前一晚轉咗聽老婆話，老婆建議佢着到成個白馬王子咁，咁就出晒事了。
情人眼裏出西施，主席老婆可能真係覺得主席咁樣好型，江華同劉華都係差唔多之嘛。