新世界發展（017）創辦人鄭裕彤入院差不多一個月，長子鄭家純除出入養和探病，生活如常，繼早排嘅「大寶藏」，最近亦有新馬落地，叫「大寶庫」。
純官係10隻馬嘅馬主，其中8隻已退役，新嚟嘅「大寶藏」同「大寶庫」分別來自新西蘭同法國；兩隻都係3歲，未曾喺香港出賽，唔知佢哋表現如何，馬圈中人就話，「大寶藏」喺海外比賽非冠則亞，料價值不菲。純官對上一次贏馬已經係2010年中嘅事，佢隻「奪寶」贏出。
純官鍾意單拖做馬主，彤叔就鍾意同朋友夾份玩。彤叔有7隻退役馬，全部同朋友夾份，包括恒地（012）主席李兆基同已故商人明嘉福，7隻馬個名全部有個「鑽」字，例如「鑽神」、「鑽王」，應該同佢周大福（1929）嘅生意有關喇。