私駕路：型搶斯文客　小跑大轆

廿零萬Scirocco，性價比計相當物超所值。男人得一想二，總要為愛車加加減減先安樂；VW新推原廠包圍、尾翼等共九項Items，唔算大改，不過喺小跑車上配上四條19"胎軨，型仔兼具跑格，視覺上極之搶眼，相信吸引到唔少喜愛動感嘅年輕斯文客。　記者：徐影龍　攝影：周旭文　模特兒：姚浩政

VW將自家小辣跑Scirocco，配上一套共九件嘅原廠改裝Parts，個個都以為外貌會變到好似落場版咁兇惡。老實講，頭尾泵把連裙腳等四邊包圍，其實改得幾低調，線條上只係輕輕在底部微彎番出嚟，而車側就飛走舊有黑膠邊，換上同色裙腳，視覺上有點點Load低車身嘅感覺。包圍唔招搖，搶眼位便落在特大19"軨，以及新款尾翼之上，令到Scirocco不致大幅改頭換臉，但又有效提升Sporty感之效。
造型雖低調，但我自己就幾Buy，始終Scirocco有着比Golf更扁平低矮車身，加上長長雙門設計，本身已充滿跑味，大幅改裝好易弄巧反拙，變成「MK戰車」。每處改少少，保留原味又有新鮮感，呢啲係男人對心愛玩具嘅主觀式浪漫，女仔未必會明，我夠覺得LV花紋十年如一日啦。
靚仔主持姚浩政，一直心思思想換Golf或Scirocco，今次搵佢嚟試車，自然特別有心得。「Scirocco比Golf更有跑格，雙門車亦係我至愛，今次原廠改裝，最吸引我係尾翼，同埋加大咗嘅胎軨，令Scirocco型仔好多。雖然唔算得上大改，不過每處都見心思，尤其坐入車廂，添加咗金屬門檻，腳踏亦換埋，由觀感到駕駛感都令我好滿意。Scirocco個天窗都唔算細，夜晚載住女伴遊車河數星星，都幾浪漫㗎。」