政府落錯藥打壓樓市，令樓價越㩒越升，即使被額外印花稅（SSD）綁死的「辣招貨」都有得炒，辣招已淪為廢招。紅磡有豪宅物業扣稅後仍狂賺270萬元，成為實施快滿兩年賺錢最勁的「辣招樓王」。低息下樓價升勢持續，SSD措施更形同虛設，辣招貨越賺越勁。中原地產首席分區營業經理王淑儀表示，紅磡海逸豪園15A座一個頂層D室面積1,404平方呎全海景優質單位，業主去年1月以1,288萬元購入自住，全沒想過炒賣，但眼見樓價飆升，「SSD監」未坐夠兩年，單位已升值逾兩成，近日終忍不住以1,640萬元賣樓，扣除5%、即82萬元額外印花稅後，仍賺270萬元，料是政府實施SSD以來大型屋苑賺錢最勁的辣招貨。即使計及其他開支包括釐印費及經紀佣金等，仍賺約192萬元。
樓價「有排唔會跌」
至於業主為何不等多三個月，待SSD完全鬆綁後才賣樓，到時可能賺得更多，王淑儀稱業主沒有提及，但相信業主只是換樓，並非睇淡樓市，始終現時樓市缺盤，息口又低，料樓價「有排唔會跌」。細價辣招盤亦炒到㷫，祥益地產分行主管李啟昌表示，屯門新盤瓏門高價開售，同區二手水漲船高，聚康山莊3座低層E室辣招盤，578方呎，剛以286.8萬元售出，單位17個月炒貴37%，除稅後仍賺62.46萬元。《蘋果》記者