【本報訊】一張張發黃的舊照片，見證香港百年滄海桑田，所記載的香港情懷始終不變，攝住一代代收藏家的眼球。連80、90後青年也加入收藏黑白舊照片行列，為求從舊相中細味香港情懷，不惜遊走舊區，在垃圾堆中尋覓舊照片，盼在舊區消失前留住老香港的點滴。收藏舊相變潮流，同時令舊相價錢暴升，動輒過千至近萬元一張，近期一套數十張的1870年代舊相集，在拍賣網更開價近80萬港元。
記者：林賽香
這邊廂建築工人忙於清拆舊區舊樓，那邊廂本地文化及藝術組織 Hong Kong Creates的一班收藏家，在垃圾堆中翻來覆去，尋找居民的生活照。
20年代照片最受熱捧
該會創辦人鍾燕齊表示，志同道合的收藏家中，有攝影發燒友，藉黑白相研究拍攝技術；有研究歷史的收藏家，在照片中尋找歷史印記；更多的是80、90後，透過相片了解舊香港風貌，「20年代舊相最受熱捧，另外當年聞名嘅中華或艷芳照相館，呢啲影樓相有好多人鍾意研究佢嘅拍攝技術同構圖，仲有當時嘅人嘅打扮」。
香港收藏家協會副主席張順光指出，以往港人喜歡收集舊郵票，近兩年則多了人收集舊相，「近年好多人搵1841年至1997年嘅香港街景相，懷念殖民地時代」。他表示，近日一張攝於1920年代銅鑼灣的舊相在拍賣網推出，即引起圈內熱烈討論，最終以900美元（約7,000元）售出，「嗰張相影到一架電車因打風，吹甩車頂，好珍貴」。
剛於樹仁大學畢業的林熙舜是 Hong Kong Creates的成員，過去四年在舊區收集了3,000多張舊相，「當初係參加個會嘅攝影班，後嚟一齊去搵舊相。舊相係一個記憶，搵番嗰時嘅歷史背景，點知一試就上癮」。他趁牛頭角下邨及蘇屋邨清拆尋寶，大有收穫，單是蘇屋邨已有逾千張。
他如數家珍地向記者介紹道：「呢張係1950、1960年代一個上流社會嘅婚禮，你睇佢哋啲衫好講究，呢張係一個平民女子，喺照相館影相畀相睇對象睇，着嗰件衫已經係全家最好，睇到一個時代唔同階層嘅生活。」
幫人搬屋換取舊照片
舊區重建，不少舊相成為陪葬品，在城市發展的巨輪下消失，令林熙舜感觸良多：「政府淨係識得起番幢建築物，冇諗過點樣保育舊區嘅人情，呢啲先係舊區嘅靈魂。」
政府靠不住，收藏家以自己的力量留住集體回憶。鍾燕齊苦笑說：「我哋跟住田生，佢去邊，我哋就去邊，每次舊樓收購，居民搬屋都有好多舊相唔要。」
為保存舊相，他們甚至做義工幫居民搬屋，換取被丟棄的相片作報酬，也有人無條件捐出舊相，並細說相片背後的歷史和故事。
