NBA中國賽第2站嚟啦，你準備好未？雖然繼續係快艇對熱火，但係今場球迷終於可以見到，快艇「舵手」基斯保羅（CP3）比賽嘅雄姿啦！佢親口證實一定會上陣，不過就唔知打幾耐。希望快艇有佢，唔使好似第一場咁畀對手炒啦。而前晚兩隊人更着晒老西，出席宣傳活動，派頭十足。（now635台今日12:30pm直播）
唔想再坐冷板凳
今日兩隊將會喺上海文化中心再戰一次，快艇首戰俾熱火炒14分，都輸得幾肉酸，所以上仗冇打嘅主力CP3上周六練完波親口同記者講：「落場比賽我OK㗎，你點睇？」打完隊內對抗賽後，佢仲可以咁樣談笑風生，睇嚟佢拇指傷勢都已經好得差唔多。不過，呢位控衞都話唔知自己會打幾耐，一切都要睇教練同隊醫嘅決定。佢話：「我唔知會打幾耐㗎，或者10分鐘啦，只要唔使我坐冷板凳就乜都得啦。」佢仲話想參觀吓上海，不過日前抵達之後第一時間就返酒店瞓覺，睇嚟佢jet lag得幾嚴重喎。
獲迪乘機宣傳新書
熱火方面，雖然上周五班飛機因技術問題而好晏先到上海，但係一班球員瞓到下晝3點幾起身，齊齊喺酒店食中餐，仲話清炒蝦仁好食。上場得5分嘅獲迪，仲為自己嘅新書開咗個簽名會㖭。至於夜晚嘅上海站宣傳活動，雙方人馬執到正一正，真係型到爆炸。不過，勒邦占士就唔多正經，聽到獲迪代表致詞嗰時係咁偷笑，都唔知係咪仲笑緊老友上周四比賽炒樽嘅肉酸場面。