臨老轉會，難免被批鬥為「折墮」、「回塘」，特別係離鄉別井，由歐洲轉到澳洲踢波；不過今季登陸澳職嘅兩老迪比亞路同希斯基，就證明自己仲有貨；上周六澳職FC悉尼主場對紐卡素噴射機，迪比亞路同希斯基都射入金球，而後者效力嘅噴射機，就以3:2險勝，打開勝利之門。
37歲嘅意大利前鋒迪比亞路，今季加盟FC悉尼，算係澳職史上最高級數外援；上周六首度主場出師，就吸引3萬8千幾人，打破FC悉尼嘅球會主場入座紀錄，會方畀迪比亞路達200萬美元年薪（約1,556萬港元），都算物有所值。
兩軍開鑼戰都輸波，今仗梗希望攞分，噴射機11分鐘憑前鋒賴恩格菲斯先開紀錄，而精采時刻喺26分鐘出現；FC悉尼獲得離門約30碼罰球，迪比亞路親自主射，好靚咁彎過人牆直飛死角入網，噴射機門將賓堅尼地連波皮都掂唔到。
噴射機3:2險勝悉尼
「細路」有金球，希斯基當然都唔寂寞，40分鐘佢接應右路傳中，第一時間右腳抽入，幫客隊再度領先；不過鏡頭所見，唔知係唔係呢位34歲前利物浦射手，食得澳洲嘅龍蝦鮑魚多，定係澳洲啤酒好飲過英國多多聲，身形發福咗唔少，肉騰騰咁同隊友擁抱慶祝。
換邊後客軍先由奇治葛雲擴大比分，FC悉尼再由比歷克包維追成2:3，不過最終都係飲恨，開季兩連敗。希斯基攞到澳職第1個入球，仲幫球隊贏波，梗係開心，佢意氣風發咁講：「隊友賽前同我講，悉尼係一個大城市，呢場波好多人睇，對己隊亦都好重要，今次贏波就真係好開心。」
面對其他球隊搶簽大牌外援，上季總冠軍布里斯班獅吼就好少理，上周六主場5:0大勝墨爾本勝利，成功開齋之餘，亦係今季澳職最大勝仗。