中渝置地（1224）啱啱公佈近季度數據，靚仔到爆，有得諗。中渝今年頭四個月嘅累計銷售額，按年仲係錄到跌幅。但集團呢期公佈頭九個月嘅內房銷售額，按年增加咗11%，到近50億銀人仔，而單喺9月份，就升咗40%到9.6億銀人仔。由第二季開始發力，兼越賣越好，靚仔到痹。再講，尤其第一季唔多盞環境底下，中渝到6月底嘅半年底純利仍然錄得35%增長，達2億銀，預售收益豐厚，又有墊底作用。又唔計任何重秤，中渝家陣NAV 5蚊，折讓66%，亦係好吸引。家陣市場環境唔就內房，冇得講，但好似港資磚頭股，頭兩季郁都唔郁，但價殘物超所值，一個QE3就炒開巷。買定中渝，中線博翻半番到2.50元，未有耐到NAV。
招商基金大折讓
招商局中國基金（133）喺A股及國企股彈到起飛之際，仲喺半年低位載浮載沉，超級大落後。又招商基金現價（10.22元）相對公佈冇耐嘅每股NAV 21.70元，大大折讓53.17%，喺祖國相關嘅基金裏面，招商基金嘅折讓，係數一數二咁抵買。呢轉冷灶煲一煲，博招商基金升21%到12.40元，又係未有耐到NAV。錢雋