在活動中為了知道新一代的想法，於是拋磚引玉由自己的童年志願開始講起，但當一想到那個做足球員的夢想都已經是幾十年前的事時，心中難免浮起了一種out的感覺。不是說做足球員很out，只是自己講番當年情這件事很老套，難怪新一代都不講這些了，志願呢啲嘢講出來有乜用呢？係囉，今時今日社會人浮於事，諗住想做乜不代表第日就有機會做乜，分分鐘講咗出嚟仲畀咗壓力自己㖭，咁不如講吓鍾意邊個歌手、邊個球星好過啦。我的志願，若果係家長老師問你嘅，其實真係可以考慮唔答，因為佢哋問得你，就大概其實都有啲標準答案；好似喺活動入面，有位中五女同學好認真咁答我：「我想做太空人！」另一位中三嘅男同學亦好認真咁答：「我想做的士司機！」兩個答案換來兩種現場不同的反應，咁你認為邊個答案得到多啲掌聲吖，梗係──的士司機啦，同學嘅掌聲大概係表示覺得呢個答案夠另類，咁若果你要回答長輩嘅時候，你會答太空人定的士司機呢？「都話唔答咯！」係係，sorry！我的志願作為一篇文嘅題目，肯定係好唔受歡迎嘅，之不過若果係大家無嘢做得閒擺上Facebook嘅status：我的志願係中金多寶／係星期一唔使早起身／係環遊世界的話，又肯定係會引嚟好友們的附和起哄；其實點會話冇志願吖，只不過係唔想講得咁大、講得咁遠啫。最近有個futsal足球場響觀塘工業區出現了，好奇查問下原來係一班由細玩到大嘅年青人，出錢出力一齊整咗個球場出嚟，歎住冷氣來踢波嘅感覺確實非一般。有呢個futsal諗頭嘅人唔少，做出來就真係少見，如果人人都用標準答案嚟諗我的志願，恐怕呢個工廠球場根本就唔會出現。志願，可以唔話畀大人知，可以唔話畀其他人知，但係記住話畀自己知。keymannow TV主持mailto:[email protected]