運輸及房屋局局長張炳良昨日呼籲市民不要恐慌性入市買樓，有知情人士指出，近日中小型住宅樓價屢創新高，令政府十分憂慮，因直接影響小市民之餘，萬一樓價大跌，高價入市的小業主必成「犧牲品」，更弊是政府已沒有多少「子彈」可以針對性地壓抑小型住宅樓價。
收緊按揭憂影響用家
知情人士指出，政府內部明白，他們手上沒有方法可以壓抑小型住宅樓價，因為短期內政府不可能推出大量中小型住宅單位應市，「最快得置安心啲單位，都要出年先賣樓花，居屋更加要等多兩、三年，即係話未來一、兩年政府冇中小型單位推出市場降溫」。至於進一步收緊按揭成數，政府又擔心影響真正用家。更大問題是若市民超出其能力範圍也要「上車」，萬一樓價大跌，他們必定首當其衝，「上一次樓市大跌經驗，呢班接火棒嘅業主係最慘嘅負資產，佢哋通常係打工仔，樓價大跌代表經濟差，佢哋係最易面對減薪失業，亦係最快斷供而損失慘重嘅市民」，所以張炳良昨日才要再「出口術」，希望市民三思才入市。《蘋果》記者