超人李嘉誠旗下長實（001）又有新搞作，就是將酒店分拆上市。QE3令全球熱捧高息股債資產，超人今次食住條水，縱然四間名為酒店，實情是服務式住宅，質素麻麻，上市定價一定好貴。多間大行已經吹水捧上天，大家如果心動，不妨先睇吓超人昔日賣資產分拆往績，先至考慮是否落叠。
可以肯定，純比較出售資產眼光，李嘉誠肯定是全球No.1。2000年賣「橙」一盤勁賺逾千億故事是經典。過去11年間，長和系共分拆至少七間公司上市，結果長實如願成功骨水，捧場股東卻成肚氣。千禧年科網熱，長實分拆出來的tom.com首日爆升逾三倍後，科網熱亦開始轉冷，股價無以為繼，及後縱成功轉板，至今股價仍累跌46%。
長揸tom.com未算輸得最甘，2002年長實再分拆長江生命科技（775）上市，當年正值董建華狂吹「中藥港」「生化港」等概念，一間沒有盈利，生意只有數十萬的公司成功吸引逾百倍超額認購，股價至今累跌68%。
長科命運與tom.com相同，只是借超人名氣招股，然後先研究搞乜嘢花臣，最重要係搶飲頭啖湯，這招超人運用得淋漓盡致，包括去年推出的首隻本港人民幣計價新股匯賢產業信託（87001）。
鬥長命或可執少少
縱有人民幣升值概念，匯賢股價半年間最多曾跌近一半，當時招股定價5.24元人仔，較今年6月底止每單位資產淨值5.21還高。與其說資產質素不佳，倒不如說超人定價非常進取，說白點是食盡你，要在他身上攞着數，只有同佢鬥長命，或者可以執少少。
兩隻REITs置富（778）及泓富（808），都是少數賺到的超人分拆出來股票，但代價就是要死揸唔放。置富03年先在新加坡上市，招股價4.75元，到2010年以介紹形式，到港作雙重第一上市。其間股價牛皮，今年REITs大行其道，成為基金新寵，年內爆升近倍，股價九年間升27%，同期恒指升幅超過一倍。
同樣命運的有泓富，05年首日上市爆升兩成至2.6元後無以為繼，股價一直向下走，08年海嘯價0.59元，唔見近八成，上周五報2.24元，重返七年前招股價。
以往每逢有長和賣產及融資活動，各大證券行必視為「佳品」，今次超人分拆酒店，未有條款、未有作價及交易細則，星期一開始推介前，已有三四間歐美證券行按捺不住俾「Like」，搶刁搶到出面，估計未來一個月，唱好報告陸續有嚟。
信超人往績，抑或大行報告，大家應心裏有數。
股榮