十月十日講起兒孫出世之事，居然收到三藩市灣區投資專家L嘅電話。專家L話：「我依家先知道，做咗阿爺之後，世界唔同晒，以前我實會一味做事要快，要人交數！搞併購要盡快完成，有人叫我做火燭鬼，但舊年有咗個男孫，老婆同我爭住抱，但新抱係正宗美國本土女士，平時冇佢電話，我地唔可以貿然去佢屋企。上星期我開會之時，iPhone響起，本來想唔聽，點知孫兒照片跟住出現，知係新抱打嚟，立即接聽，會都唔開住咯。新抱話佢要出城一行，問我肯唔肯去baby sit，嘩，急忙應承，返回會議室就話我有家事要辦，公事順延一個周末，下星期先至講，跟住就返屋企接老婆去阿仔屋企嘞！」
講到咁繪影繪聲，真係同佢平時性格唔似噃，駛唔駛咁緊張呀，最近生意淡薄至啩？於是同佢講美國經濟，指九月份美國失業率急挫零點三個百分點，至7.8%，顯示就業市場復甦，有利奧巴馬連任。專家L冷笑一聲：「搵鬼信咩，Jack Welch在Twitter引起一片陰謀論，雖然我都唔信勞工部會造假數，但確實係好多人退出勞工市場，勞動人口比四年前奧巴馬就任時減少好多，故此羅姆尼話如果勞動人口與前相同，今日嘅失業率係10%以上，並非無理。我地做創業投資呢行，自黑人總統上任後，黑足四年，如果佢連任，我諗會繼續黑仔，選羅姆尼上台變一變仲好！」
佢人在矽谷多年，知道矽谷政治氣候，最近矽谷人士捐款俾羅姆尼有增無減，四年前嘅奧巴馬矽谷粉絲公然公開挺羅姆尼，話要對奧巴馬發出一個訊息喎：「等佢知道我地點諗！」把口常講求變（Change）之人，前有奧巴馬，今有梁特首，好驚呀，CY唔會搞到香港黑足五年呀嗎！
專家L話美國長期職位減少，兼職增加嘅一個原因係大公司與中小企對前景不明朗，唔敢開出長工職位，好似佢家公司咁，以前有好多小公司分別應付不同稅務需要，但奧巴馬上任後，加強企業監管，每間公司每月每季都要填交種種不同報告表，填漏而俾政府捉到，會好大件事。自己發覺填漏一兩份表而自動補番呢，每份罰款五千美元！專家L於是索性大大削減子公司數目，以節省合規成本，如此一來，會計師/公司秘書咪少咗工作，可以炒長工囉，有必要先至請番舊人回來兼職呀！