哈囉喂又嚟啦！又是人嚇人玩到癲的時候，本港兩大主題樂園掀起連番鬼鬥，海洋公園的「十月全城哈囉喂」PK迪士尼樂園的「黑色世界」，糖妹一日連踩兩場搵鬼嚇自己，步步驚心的她慌到腳軟跌落地，尖叫狂呼：「好驚呀！」
海洋屍變
踏入10月哈囉喂，兩大主題樂園的鬼屋都打開大門，日前糖妹就挑戰膽量連闖兩關，第一站去海洋公園探鬼屋，先入「全院『嚇』滿」玩，甫入內已被一隻突然彈出的惡鬼嚇到跌低，跟住轉入一條百屍路，又有一隻真人版殭屍跳出來嚇人，糖妹驚到倒後行唔敢望，最恐怖還是走進陰森的籠屋，她聲震震說：「佈景同道具好真，連花樽都會郁，真係人都癲呀！」
飲孟婆湯
玩完「全院『嚇』滿」後，糖妹就轉戰「5D地獄不歸路」，被黑白無常嚇到三魂唔見七魄，再被陰差嚇到跌低屁股落地，突然又有一隻彈弓鬼飛出來，糖妹驚到大字型貼埋牆喪叫，最後還被孟婆灌飲孟婆湯，嗌到聲嘶力竭的她說：「5D影像做得幾真，仲要不停轉角遇到鬼，人嚇人冇藥醫，裏面又好臭，氣味做得幾足，好似真係落咗十八層地獄。」
米奇錫番
在海洋公園盡興而歸後，糖妹再殺落迪士尼「黑色世界」，先在美國大街和狼人跳馬舞，化完萬聖節妝才入鬼屋「詭墳學院」玩，糖妹說：「佈景好精緻，好鍾意啲造型，女學生俾人縫咗個嘴，但都好靚女，有個瘋狂博士衝出嚟嚇大家，裏面啲人會同你講嘢有互動。」之後糖妹再去另一間鬼屋「黑色馬戲班」，見到樹妖、神婆又驚到大嗌，她說：「裏面有好多無頭公仔，以為全部係假人，點知其中一個彈起嚇人，真係好恐怖。」
享受食扒
玩完鬼屋後，糖妹就去嘆萬聖節晚餐，大讚牛扒好味，又拿電筒仔自照扮鬼，跟樂園內的雙面鬼鬥嚇人，最後當然要跟萬聖節look的米奇老鼠合照啦，米奇還跟糖妹嘴對嘴，令她勁開心：「迪士尼成個氣氛冇咁驚，視覺享受多啲。」