警務處處長曾偉雄上場以來，社運界爆發「檢控潮」。去年十．一在中聯辦外示威的FM101成員泰歷被控襲警罪，法官指他推鐵馬及企圖攀爬有「襲警意圖」，重囚半年，是近年示威者判刑最重的案件。
泰歷上訴 免立下壞案例
23歲的泰歷憶述，當時見警察拉扯同伴曾健成，打算攀過鐵馬聲援，「所有警察證供都話我推鐵馬嗰陣，兜巴打橫摑落差佬度，但係兩條片都影唔到，個官就取消呢個point。差佬同我有手碰手，再退後。個官認為後面係馬路，好危險，所以我推鐵馬都算襲警」。
泰歷指政府藉此案殺雞儆猴，嚇窒中聯辦示威者。他惟有上訴，免立下重罪案例，「推鐵馬唔係毆鬥，封住條路唔畀人行，我拉開佢，係好簡單嘅邏輯。你面對緊警察，受法律制裁一啲都唔奇。唔係話坐監好過癮，但係挑戰制度必定要成本」。人權監察總幹事羅沃啟已致函律政司司長袁國強，要求修改襲警罪檢控政策及程序，不應給警方酌情權。羅解釋以往示威者被控襲警，每年最多一宗，07年至今卻最少20多宗，「警方有利益衝突，唔應該由佢哋決定檢控。檢控官唔做就等於摑警方一巴，所以好少縮沙。萬一遇到釘官，明明唔夠料都會告得入」。
《蘋果》記者