滑水板用嚟做乜？咁梗係滑水啦。不過，英國女子組合The Saturdays就話畀大家聽，滑水板可以用嚟喺陸上面玩滑沙㗎。話說The Saturdays幾名成員，前日喺加州威尼斯海灘為新節目拍外景，着住火辣比堅尼嘅佢哋，將滑水板放喺沙灘上面，然後瞓喺塊板度扮滑水，轉頭又着住半件潛水衣跳埋舞㖭。喺陸上扮晒嘢嘅佢哋，到真正滑水時就雞手鴨腳，Vanessa仲嗌晒救命，就嚟跌落水㖭。