今天不回家，因為要露營，很平凡？摸黑攀石呢？夠刺激吧？同場加映拍攝婚紗相，貪維港夜景夠浪漫，不知攝影師通宵開夜班收費多少？若三樣一起做呢？看過攝影師茶包拍攝的婚紗照，人人嘆：「有無咁癲呀？」
記者：陳慧敏 攝影：潘志恒 部份相片由Teabag Photography提供
秋天上山夠凉快
一對新人穿婚紗踢死兔，腳踩攀石鞋倚在崖邊，誇張的婚紗拖尾擱在懸崖，人扯住游繩吊在半空，以閃亮的維港景色托底，另加IFC做佈景板，之後來個深情熱吻，問你死未？首個有此極限演出的是港隊攀石運動員、2010年搶包山女子組冠軍黃嘉欣，之後有攀石朋友Carrie與丈夫王志傑，鐵人Crossover系列還陸續有來：「月尾，我哋安排同朋友露營，等影日出婚紗相。」癲夠未？荒山野嶺，黑漆漆伸手不見五指，一身累贅禮服，無水源又怎化妝梳頭？「唔使驚，個化妝師都係我哋啲攀石朋友，佢都識得攀石㗎。」其實攀石影婚紗照，在台灣流行已久，甚至有更刺激的跳水跳降傘婚紗照等等，茶包：「我仲計劃緊影潛水婚紗照，一切在進行中。」
有幸體驗入黑上山的驚險，話說採訪當晚八時，相約茶包跟幾個份屬「Hiking Village」的朋友，來一次「簡單的」夜間攀石之旅，目的地是「較簡單」的芙蓉山。起步點在元荃古道一個路口，約走45分鐘山路即達，聽落簡單，實情一點也不簡單，累得我渾身痠痛。還好辛苦是值得的，人坐在四五米高的大石上，荃灣、汀九及青馬大橋美景盡在腳下，一片金黃燈海映入眼簾，好美，真的好美。
他們每個多月就辦一次這樣的山間夜遊，可以是攀石，也可以是露營，偶然還兼拍攝婚紗照，組合多元化。夜間攀石需要更多技巧，「必備足夠頭燈或燈光，而且要睇清楚石頭孔洞位置先能夠攀爬，難度高咗。」還得留意在草叢裏出沒的蜈蚣或蛇，茶包說：「不過好處係溫度無咁高，夏天日頭時間太熱啦，家入秋，夜晚山頂有凉風，好舒服。」同一塊石，也有多條難度不同的攀爬路線選擇，他們只在石下鋪厚墊，手拍上白粉就爬。茶包：「呢塊約四五米高嘅大石，難度只屬最初級嘅V01至V05級，我哋用墊就夠。」想參與？歡迎，登入攀峰寨Hiking Village Facebook網頁，付$100會費就可以有三次攀石體驗，費用用來Book室內攀石場與買食物，戶外攀石則免費，報名預人數就可以了，上到山有沒有九大簋吃，則視乎團員心情。
山頭兜兜轉
入黑攀石，出意外怎麼辦？茶包：「夜晚迷路，其實比日頭更易搵到你所在，因為山頭無燈，你頭燈有燈光，民安隊同直升機好易就睇到你。當然，你都要有足夠裝備、熟悉地形同有足夠行山知識先好夜晚行山。」試過有朋友入黑上山迷路，也是他跟朋友們自組救援隊尋回他們。最驚險的一次，案發經過是這樣的，身為外展社工的茶包說：「嗰次我同班小朋友行赤徑做訓練，預定傍晚六七點可以返到小食亭，仲叫女友帶定飲品接我。」女友等呀等，就是未見他蹤影，茶包：「指南針明明一直指住一個方向，點知行來行去都係見到同一棵開叉樹，嗰條路我行過幾十次，熟到爛，都唔明點解行錯路，硬係兜返去同一棵樹嗰度。」那怎麼辦？「咁……祈禱囉！」最後折騰到十時多，終於走出樹林。驚？「咁無嘢嘅，我哋有齊裝備，最多咪喺樹林瞓一晚，天光一定搵到路走。」鎮定，從來是山林裏求生最重要的事。
茶包自問是爛玩之人，「我哋平時就算朝早六點出發，都會袋定頭燈，成日諗住玩到傍晚五六點落山，結果多數玩到十點，個天都黑齊喇。」為玩得方便，同行團員叮叮還改裝了一些小道具，如一條感應式吊燈，來自鴨寮街飾櫃裝飾用燈，加感應器輕輕一掃就亮燈，連接USB電池，夠光之餘開一整晚都無問題，比頭燈更光亮耐用。
搭營起爐煮熱湯
相逢恨晚，約訪問約得很急，約在翌日大家都得上班的周二晚，茶包事先講明只能準備簡單食物招呼我們，還不好意思云云，我與攝影師只好預備麪包上山醫肚。
午夜，山頭開始風大，人開始肚餓，他們快手快腳搭營起爐，到最後，茶包居然變出羊架、安格斯牛扒與面膜般大的魚柳，我與攝影師大驚的同時，叮叮已送上熱辣辣忌廉蘑菇湯，之後洗淨個煲，他們放入生菜、蝦丸、腸仔打邊爐！荒山野嶺，用橄欖油煎香的羊架燒得吱吱作響，灑香草、海鹽，香得連躲在岩石裏的小青花蛇也探頭而出。這也叫簡單食物？那何謂正宗？團員七嘴八舌：「羊腩煲啦！」「蒸魚、蒸水蛋、煲仔飯……仲有紅酒。」「上次叮叮仲變個木瓜出嚟做早餐，嚇死！」我還以為只可以吃公仔麪，茶包：「我哋唔食呢啲嘢嘅，喺山上面唔可以待薄自己。」上山頂都要吃九大簋，已經是一圍酒席啦，只欠新郎與新娘，這還叫露營嗎？
國際山難求救訊號
大吉利是又好甚麼都好，行山幾時都要有自救意識，記住以下三點，隨時救你一命。
1. 一分鐘內，以哨子、鏡或金屬片、電筒或揮動鮮色衣物，連續發出六次長訊號，停頓一分鐘後重覆，不能中斷，以助救援人員清楚知道求救者正確位置。
2. 在可能情況下，用石頭或樹枝堆起每字最少6×6米的「SOS」字樣。
3. 記錄標距柱號碼，以確定位置。