香港足球隊日前以7比4贏德國、5比3力挫法國、互射十二碼贏埋意大利，再以15比2大炒瑞典！唔係講笑㗎，真有其事。曙光足球隊今個月6日，代表香港參加喺墨西哥舉行嘅第十屆無家者世界盃，首日雖然出閘脫腳輸咗，但之後成功擊敗呢4支歐洲球隊，頭九場比賽4勝5負。噚晚深夜分組賽第二輪對法國嗰場雖然未知賽果，但以現時嚟睇，分分鐘可以造出05年參賽以嚟最佳成績。曙光足球隊最好成績係08年，48隊中排24位。
賽事今日進入爭盃階段，大會除咗八強、四強及冠軍戰外，仲設立多個盃賽，分組賽成績唔係咁好嘅球隊，都可以踢多幾場玩吓，始終呢個比賽主要目的都係想世界各地弱勢社群，藉此機會重拾自信啫。賽事聽日完結，曙光足球隊繼續努力呀。做出好成績嘅話，向政府爭取香港申辦2015年無家者世界盃都易啲。