高檔商場太古廣場Pacific Place（PP）係本港數一數二嘅名牌集中地，但噚日竟然驚現貧民窟，商場唔通唔驚嚇走強國自由神掃貨？無國界醫生一連十日，喺PP嘅商場以木板及仿磚牆搭建簡陋貧民窟，用圖片展覽話畀沐浴於名店嘅貴賓知，貧民喺缺乏飲用水、衞生設施、醫療服務嘅環境下，點樣掙扎求存。PP嘅「貧民窟」噚日一開幕已經有好多人去睇，呢個展覽會稍後會移師太古城中心。
無國界醫生話，全球每十個人當中，就有一個住喺貧民窟！呢次展覽嘅相片係由著名紀實攝影師操刀，展出南非、肯尼亞同巴基斯坦嘅低下層故事。
排便用「飛行廁所」
其中肯尼亞嘅貧民窟，由於大部份房屋都冇廁所，所以居民需要外出使用公共廁所，但晚上治安欠佳，居民惟有利用「飛行廁所」，即係喺個膠袋排便，之後再丟出窗外喎﹗而政府亦唔會派員掃街，公共衞生係點？大家估到啦。