今年萬聖節的宣傳來得特別早，城中不少消費熱點，都出盡法寶引人注目，不論想要潮爆、驚嚇、童真的氣氛，抑或歐洲傳統、鬼佬味濃、電影朝聖都可以，成個月玩盡哈囉喂，將現實中不想妥協、不幸的人和事暫時放下，在幻想空間裏暫時抽離，補充一些開懷正能量。
潮爆驚嚇 任君選擇
電視上日播夜播的爆笑聖羅蘭同教父，今年會在旺角朗豪坊以名店櫥窗形式亮相，八大場景保證影相影到爆卡。迪士尼的3D動畫《怪誕復活狗》大型場景則會空降銅鑼灣時代廣場，調校黑白模式影相氣氛超正。要驚嚇又有得玩，樂富廣場有佔地一萬方呎的「猛鬼馬戲團」免費開放，唔想排長龍可以消費200蚊攞特快套票。
嘩鬼纏身始終容易嚇親小朋友，紅磡黃埔新天地的「3D奇趣Zone」，最嚇人都只不過是飛天掃帚同背脊多對翼扮天使。大嶼山愉景廣場亦玩得盡情，螢光筆任畫牆、哈囉喂主題攤位遊戲加上鬼佬鬼仔特別多，零舍應節。旺角新世紀廣場則有來自德國的詭祕傳說「奪面黑森林」場景同美國鞋靈匠Gwen Murphy 的「鞋口鞋面鞋靈展」，同場還有應節cupcake 同 macaroon，適合喜歡傳統得來另類一點的人士。
記者：伍志輝
銅鑼灣時代廣場（2118 8900）
樂富廣場（3168 0080）
旺角朗豪坊（3520 2800）
旺角新世紀廣場（2397 0790）
紅磡黃埔新天地（2121 8344）
大嶼山愉景廣場（3651 2345）