香港數碼廣播電台DBC前幾日正式停播，特首有權收番DBC嘅牌照，鄭家富、林旭華等主持人同一班員工，決定下周一至日「義播雲天七日情」，咁樣算唔算符合發牌條件呢？一直唔表態嘅商務及經濟發展局噚晚終於出新聞稿，局方轄下嘅通訊事務管理局辦公室話，已經收到DBC恢復廣播書面通知，仲話呢個通知等如取代咗DBC之前宣佈停止運作嘅通知。
咁即係當DBC冇停止過運作？通訊辦冇講明，只係話已經去信DBC了解「復播」詳情，又提醒佢哋要遵守牌照條款同《電訊條例》，總之始終都唔明確表態，亦唔肯介入事件。
下星期義播期間繼續有鄭家富同林旭華主持嘅《風波裏的茶杯》、《開心快活人》、《霎時衝動》同《星空再遇鐵達尼》等節目，大家部數碼收音機可以用多幾日。