利物浦前鋒阿蘇近排變咗過街老鼠，佢喺上場英超喺禁區一次違反力學，自己撻落地嘅「表演」之後，連英國《太陽報》都出嚟抽吓水，搞咗個網上投票，提供7個球員俾網民去選出英超插水王。現時由蘇亞雷斯遙遙領先，喺超過38,000人投票中，佢就獨佔6成選票。不過都可以同阿蘇講句「You'll never dive alone」，曼聯翼鋒艾舒利楊格今季上陣次數甚少都成為亞軍，插水王形象一樣深入民心。
楊格插得更專業
除咗大熱阿蘇之外，今次有份競逐英超最衰插水王嘅仲包括加里夫巴利、安祖卡路爾、查維亞靴南迪斯、大衛雷斯、奧斯卡杜斯山度士同埋艾舒利楊格。阿蘇係又跌唔係又跌，喺對史篤城之後更加犯眾憎，連國際足協副主席都話要嚴打插水。佢喺今次選舉拎到超過6成選票，成為英超插水王可以話係實至名歸，之不過我求大俠嘅神聖一票就投咗畀艾舒利楊格。呢位曼聯翼鋒喺09同10年都曾經因為扮被侵犯跌低而攞黃牌，喺上季嘅表現更加出色；喺4月對住昆士柏流浪同埋阿士東維拉接連插水得手博到12碼，其中佢對住舊東家維拉都一於冇情講照插可也，的確係夠晒專業。
熱刺嘅加里夫巴利係今季英超目前因為插水拎黃牌最多嘅球員，兩次俾球證捉到。巴利喺今次投票暫時就得到近一成支持排第3，成績都算唔錯。
波連尼骨折利記頭痕
阿蘇唔使「dive alone」，而另一利物浦前鋒波連尼就要用返球會名句「You'll never walk alone」嘞。波連尼喺日前返去意大利，為U21國家隊備戰對瑞典嘅U21歐國盃附加賽賽事，點知喺操練嗰陣受傷搞到隻腳骨折，家一個人真係唔可以「walk alone」，暫時都未知要唞幾耐，但利記就得返阿蘇一個前鋒。