前特首煲呔曾卸任三個幾月，唔少告別飯局都係靜雞雞進行，以免又俾人話佢「貪曾貪飲貪食」。八方聽聞，民主黨同煲呔總算相識多年，所以早喺今年初已經講好要食海鮮同佢farewell，但八方聽聞呢個「白鴿與煲呔」嘅飯局到家仍未有着落。
曾喺同一間酒家歡送肥彭
已卸任嘅民主黨前議員李華明講，呢場惜別飯局早喺煲呔被揭發藉外訪之名，嘆盡榮華富貴嘅醜聞之前約好咗，煲呔當時仲話，等立法會選舉後，先至同民主黨大快朵頤，費事招人話柄。但冇耐「貪曾」醜聞就停不了，民主黨仲向佢提出不信任動議，又話要用權力同特權法調查佢有冇收受利益，飯局自然無下文。
據講飯局原本打算喺鯉魚門嘅海皇園林食，呢個地方就係當年民主黨歡送末代港督肥彭嘅地點。唔通凡係港英餘孽，都對呢間食肆情有獨鍾？據講海皇園林招牌菜係椒鹽瀨尿蝦同蒸鮑魚，八方覺得炒飯同咕嚕肉都不能錯過。
煲呔雖然退下火線，但仍然係傳媒焦點，據講長期有狗仔隊招呼佢，睇吓佢有冇行差踏錯，因此白鴿黨都好小心，否則將呢場惜別飯局變成醜聞飯局就弊，民主黨唔通仲唔夠煩咩？
八方噚日問過涂謹申，佢話記憶中的確係同煲呔約過呢場惜別宴，可是煲呔潛咗水，飯局冇主角開唔成枱，阿涂又話自己百無禁忌，隨時奉陪同煲呔食飯，齊齊潛水開餐又好冇呢？
mailto:[email protected]