「因為日頭要返工返學！」 「因為少車較安全！」 「因為……型囉！」
近年梗牙單車（Fixed Gear）日熱，同好在網上召集，相約周末晚「不回家」踩通頂過腳癮。你道，他們蒲天光實係死仔，是「馬路煞星」；佢話，日頭無時間也無地方可踩，晚上車少路變闊只為更安全！ 記者：陳慧敏 攝影：潘志恆
何謂梗牙？
梗牙就是無煞車掣的單車！原為場地賽專用車，黃金寶奪冠都憑它。單車輕身偏平，無煞車掣，想停就得靠自己，將腳踏後踩或將單車打橫「甩尾」急停。一班人起步前先擬定終點，沿途得動腦筋規劃路線，抄小巷走小路，期以最短時間到達目的地。
午夜出動 不是死飛
七、八年前，同事也做過「午夜踩車的少年」訪問，凌晨一至四點，車友兩次被警察抄牌（抄身份證）。家呢？Brian：「冇俾警察拉喎！多咗人踩單車，風氣好咗，知道只係喺度做運動或練車，捉都多數捉啲十幾歲，（單車上）裝晒喇叭、車胎閃晒燈嗰啲。不過都唔代表佢哋係壞分子，只係覺得踩夜車要咁啫。」
Bicycle Pit老闆Brian曾居英國，出入都踩梗牙。回港開了梗牙單車店，組織了Mofo Xprez死飛團隊。逢周日凌晨12點，廿多台梗牙從車水馬龍的馬路穿梭出發。午夜，由旺角彌敦道到尖沙嘴海旁都換了個樣：沒了霓虹燈的西洋菜街差點認不出來，廣東道極清靜，海港城後一個停車場變成三面環海的大展台，讓他們在維港夜色下開心練花式，跌到一仆一碌，爬起，又練過。馬路上偶爾有白背心阿叔踩單車送消夜，感覺真爽。為跟貼拍照，我的小貨車有時得繞路而走，他們則閃進小巷抄近路，幾分鐘後在下一個交叉路口又重遇，好型。究竟你哋踩幾快？Brian支吾：「20、25（公里）左右啦。」旁邊朋友眼都突：「起碼30幾（公里）啦你！」
煞車掣 晚行朝拆
在報界網絡搜尋「踩夜車」三字，彈出清一式車禍報道。還好眾人未試過被四個轆撞，但大小傷疤總有。在海旁拚命練習「後溜加單轆旋轉」，跌得咪話唔甘。Brian亦試過撞埋壆，炒到牙都崩；團員鬼鬼展示腳上七吋傷疤，「天雨路滑，踩得快炒低咗。」見過鬼怕黑，往後就住踩？「冇喎，好閒啫，之後仲大膽咗。」
根據本港法例374A 章第87 條《道路交通規例》，在香港出售的梗牙必得連同煞車掣，沒煞車掣的只能在特別單車場地行駛，若踩出馬路，被抓的最高可罰款一萬元及監禁六個月。是以，要夜遊，Brian等人還是會裝回煞車掣，加回尾燈：「冇咗呢盞燈又罰$200！其實為求正宗，好多人都會拆咗個煞車掣，因為覺得自己控制得到，特別係練花式，有個掣頂住，好多花式做唔到。」咁點？Brian：「真係練花式時先拆咗佢囉！」
港欠踩車配套
踩梗牙還有比賽可參加。今年8月，香港就有Levi's首屆自在騎行Alley Cat Race山貓賽，由80年代多倫多的都市信差們發起，已蔓延全球。比賽只有目的地，無指定路線，沿路要完成Check Point及特別任務，如到便利店買水連單據帶回或收集比賽蓋章等。這次，團裏成員Charlex便在男子組比賽中獲冠，Orange則為女子組冠軍。現為準社工的大學生Charlex連返學都踩單車：「有人問點解踩單車返學，咁我問點解你搭地鐵？都係交通工具之嘛。係道路安全意識同心態問題，香港踩單車的配套好唔夠，歐洲好多國家，單車係環保交通工具，市中心都有單車專用線，日常踩單車返工返學好Casual，馬路上大車讓細車係常識；但喺香港，踩單車只係消閒，啲的士仲會駛近你，想逼走你。」Brian便曾給的士逼埋石壆差點炒車；好了，去單車徑踩吧，周末日，嘩，單車多到呢！初學者、自由行同高手共冶一爐，路上救護車及踩單車的醫護人員來來回回，光天化日之下，意外全日上演。踩車，還是半夜好。
午夜單車美景推介
1.黃埔碼頭前大草地：「黃埔碼頭前有片大草地，有巴士站。日頭只准跑步，但到夜晚冇人，我哋就去練車同坐吓草地吹海風傾偈，好舒服。」 Orange說。
2.海港城背後停車場：深夜，只有少數人在夜釣，可以無顧忌地練習各種花式。Brian：「平時泊晒車，入到去都睇唔到海景；凌晨啲車走晒，就變成三面環海的大平台，夠空曠，可以喺度練花式。」
入門系
1.Jamis BEATNIK車身只重25磅，美國製，售$2,800。
2.日本Sugino 75 曲柄，即是後輪中間的轉盤，售$4,870。
3.法國牌子Victoire花鼓，$2,980一對。
Bicycle Pit（2411 1884）
佐敦文苑街46號地舖
凌晨四時．．．．．．
踩到凌晨四時，西洋菜街開始多貨車出入。車友們七嘴八舌講到橫街窄巷美味的清晨食堂，食飽飽，疲態畢露，下場？回家沉睡去也。
