今季得到懷特侯活同尼殊加盟而戰力大增嘅湖人，陣中王牌射手拜恩梗係意氣風發；日前佢接受訪問時，就勁寸05/06球季嘅隊友完全唔夠班，搞到佢要場場孭晒飛，仲話唔係隊友渣，嗰屆早就贏咗MVP；咁樣翻舊賬，冇品咗啲喎。
彈S柏加冇料打NBA
搵番拜恩嗰季嘅數據，佢打咗80場常規賽，平均上陣時間達41分鐘，每場攻入35.4分，仲有4.5次助攻同5.3個籃板，對速龍一戰仲獨取81分！Kobe打到咁出神入化，但湖人都只取得45勝37負，西岸季後賽首圈就已經俾太陽3:4淘汰埋。回憶番當年，拜恩仲好嬲咁講：「S柏加？佢根本無能力立足NBA；要我交波？唔通交畀加域布朗、美恩？佢哋唔掂，我先至每場要射45次咋。」
拜恩今時今日仲要搵班舊隊友嚟出氣，其實佢哋都幾無辜；當年湖人成績差，一來球會管理不善，仲要孭住大前鋒白賴仁格蘭1,400萬美金年薪合約，搞到冇錢擴軍，S柏加都只係收75萬美金年薪，平均都有11分同3.7次助攻，你仲有咩期望？
「佢當隊友冇到」
家已經去到多明尼加共和國落班嘅S柏加，對於「躺着也中槍」梗係好不滿，S柏加就反擊：「佢從來都當隊友冇到，當面同我哋講，我哋冇資格同佢講嘢。而且從數據上睇，我一啲都唔差。」
講真一隊波成績好同唔好，全隊都有份，湖人呢年成績唔好，唔通拜恩、當時教練積遜冇責任咩？勒邦占士當年一個人孭起騎士，結果總決賽食蛋出局，都冇咁冇品批評舊隊友啦。湖人今季連埋「超人」、尼殊、加素同世界和平，合組所謂Super 5，如果咁嘅隊友都幫唔到拜恩再攞冠軍，佢老人家到時有咩藉口？
狀元嚟料
黃蜂新人狀元安東尼戴維斯（左），貢獻12分及9個籃板，協助球隊取得熱身賽3連勝；黃蜂將於今日作客火箭。（now678台今日8:00am直播）美聯社
