【台北】
今年33歲嘅周杰倫（周董）同19歲嘅模女友昆凌拍拖就快兩年，日前俾人發現佢帶昆凌到英國度假，周董去年接受訪問時講過計劃去英國嘅倫敦眼透明摩天輪上面求婚，所以此行被爆專程求婚。
前日周董同周媽媽葉惠美由英國返台灣，不過就唔見昆凌，估計佢係用調虎離山之計，安排昆凌坐其他班次嘅飛機；佢哋為咗避記者，周董除咗全程戴口罩之外，兩母子仲用咗1萬6千元新台幣走商務中心特殊通道出關。
高調巡舖
周董行事低調，前日返咗台灣之後就反常咁透過好友微博放咗佢巡視餐廳嘅相，同行仲有周爸爸，似乎係故佈疑陣，想掩護昆凌當晚回台唔會俾人跟蹤。另外，有傳昆凌嘅媽媽日前同親友自爆正籌備女兒嘅婚事，不過周董所屬嘅杰威爾就例牌否認。撰文：丁寧
