現年49歲嘅鄺美雲直認同樓神林達民拍拖，圈中剩女都急急發功搵真愛，喺情路上跌跌碰碰、46歲嘅鄧萃雯前晚係灣仔出席活動時，都默認有新戀情。八年冇拍拖嘅雯女前晚現身時春風滿臉，一副久旱逢甘露嘅甜樣，雯女起先哦哦，最後忍唔住漏口話：「笑吓就蜜運，你哋話係就係呀，開心囉，我只會答開心。」
至於係咪有幾個追求者時，雯女就話開心唔使好幾個，之後就想扯開話題話家物色新經理人，又指揀經理人好似揀老公男友一樣。記者話鄺美雲都覓得樓神，雯女即笑話：「我都要識個戲神（演技）或者才神（才華），如果影到唔係戲神同才神唔使登，一定係假。」
嘉穎扭親
同場有鄭嘉穎同馬賽，嘉穎頸部貼咗膠布，佢話之前喺內地拍劇集《葉問》時扭親，返港後睇跌打肌肉發炎。年賺4,500萬嘅嘉穎，被笑財多身子弱，佢即話：「唔係啦，家盡量唔拍太大動作嘅戲，不過唔會驚咗拍打戲，演員乜都要試吓。」
