上星期六跑完馬回家之際，突然收到中學同學Ｐ電話，話同學Ｗ自西雅圖回港，約相熟同學飲茶，因時間就來就去，難以統一，決定在星期日早上七點在尖沙嘴飲早茶！咁早？未起身喎，不過都係勉強起床趕去尖沙嘴見吓同學Ｗ啦，想不到咁鬼早，酒家內居然有一半上座率，以老人家為主。飲早茶呢回事，以前只有老竇叫到，先至去瓊華、鳳如。老竇過身後，恐怕只有呢次係最早！
同學Ｗ話美國經濟極差，失業率高，搵工好難，好多人搵到冇心機，索性退出勞工市場。在座同學Ｎ係會計師，公司有過百人，亦話美國不景，監管過嚴，對中國公司又有偏見，嚇怕咗中國民企去美國上市。同學Ｎ讀書聰明過人，全班年紀最細，好似係最快考到會計師牌照嗰位，家應該上岸啦，點知會計Ｎ大發牢騷：「上乜岸啫，預備坐監就真，上屆立法會通過惡法，我地叫做139條，要我地為人客查數核數簽名嘅負責人，負上刑事責任，有乜依郁，我要坐監㗎，本來我叫兩個已考到會計師牌嘅女兒返公司接我班，依家我唔制咯，叫佢地在外面搵份大公司會計職位，慢慢升上去做CFO，稽核總監嘅職位算數，千祈唔好做核數師！我老咯，坐監咪等我去囉。你有後輩，叫佢地唔好讀會計呀。」
講到咁㷫，皆因為客戶核數，出事嘅話，簽署報表嘅核數師可負刑事責任，雖然比較難以入罪，要證明核數師不顧後果地（recklessly）明目張膽為虛假不實賬目簽名，十分困難，但已具備足夠嚇阻作用，令核數師對客戶查問數字，問到不勝其煩，問完又問，查完又查，至於因此而產生之交易費用，自不然由客戶承受，每年核數師收費都會向上調整，令中小企增加負擔。
飲早茶講可能坐監之事，十分掃興嘅唧，不如講番童年之頑皮事，當年校長成日板起塊面，同學見到佢都驚，同學Ｌ記得佢有一句名言，就係：「唔好俾我喺嗰啲地方見到你地！」今日講番起，大家仍然大笑不止，我地放學後就在旺角行街，砵蘭街、新填地街有不少「嗰啲地方」，成行成市，去魚蛋檔並非食魚蛋，中學生就冇錢上去嘅，不過校長咁樣警告我地，大家就嘩然囉。