家用遊戲溶入音樂元素唔係首次，最弊當拎起支「結他」，按鍵來去幾粒音符，形似神不似！想挑戰更高難度，不如學Kolor玩《Rocksmith》，遊戲結合真正電結他，駁上專用Cable立即Solo，你玩得越叻，更可Unlock大量電子混音器，要純要辣由你決定。 記者：陳國輝 攝影：伍慶泉
主音變Bass考起Kolor
平心而論，《Rocksmith》 係我所見音樂Game當中，最專業最複雜嗰隻！可能由美國Ubisoft開發關係，可供選擇嘅音樂主要係歐美Band Sound，例如Radiohead、Nirvana等，但對於日練夜練嘅Band仔嚟講，理論上閤埋眼都識得彈，更何況佢只係照傳統音樂遊戲玩法，考你彈奏反應！講到尾，基本嘢實難唔到大家，但隨住你分數越高，所需嘅結他技巧就越多，好似Kolor各成員即場試玩，開始仲係按照簡單音符彈奏，但過一陣畫面就出現Slide、Hammer On、Pull Off等真正電結他技巧，速度仲越來越快，駁埋隻MK喇叭，搞到好似開緊Live Show，聽落特別有Feel！
但Kolor話，最難忘並非彈奏技術，而係遊戲嘅仿真程度！《Rocksmith》內附送一條Real Tone Cable，一邊係Jet頭接駁自己支電結他，另一邊係USB接駁PS3，用埋私伙武器，遊戲還同時支援兩支結他齊齊Jam歌，甚至可將六條弦嘅主音結他化身為四條弦，變做Bass㖭！
拎高分Unlock靚結他
玩得結他Game都知根本無爆機之日，你只能夠不斷提升個人技術，挑戰更高難度嘅音樂！《Rocksmith》亦有大量「着數」益高分玩家，例如你累積達到指定分數，就可以Unlock唔同款式嘅Gibson結他，每一支造價過萬元，就算買唔起，都可以透過PS3一嘗玩Gibson的快感；更筍嘅係，遊戲仲可以為你Unlock多款電子混音器，鍾意Pure啲、辣啲，或反傳統扮民謠歌王歐瑞強玩木結他？Unlock之後你想點都得！遊戲亦提供為入門初哥而設嘅教學課程，由最基本拉弦線、Tune聲開始，到好複雜嘅技巧都有，且全程採用視頻教授，各位唔使驚悶親啦！
成員試彈 第三Round玩爆燈
Kolor各成員輪住試彈，起初大家都未了解點玩，但到第三回由高豐出馬，已經摸透遊戲玩法，得分更接近爆燈！主音Sammy話遊戲仿真度極高，尤其去到第20格仍然有得彈，比傳統結他Game更專業，抵讚！不過，缺點係有些少Delay；而Robin更建議玩前先聽熟首歌，以免「中伏」！
《Rocksmith》
主機：PS3 類型：音樂
開發商：Ubisoft San Francisco
玩家：2人
售價：$450（附送一條USB轉電結他線）
