兩大新界大盤開售，搞到地產代理年尾特別忙，新地（016屯門瓏門賣完冇耐，恒地（012）同新世界發展（017）合作嘅元朗尚悅本月底開賣，呢個盤有2580伙，沽清嘅話，發展商可套現120億，佣金最少4億，各大代理正磨拳擦掌，打算搶奪呢筆肥佣過肥年。
美聯冇咁大手筆
中原最積極，就算近日天氣麻麻，都幾次出動直升機拍攝尚悅高空相，埋單使咗30萬至40萬，但相對4億佣金呢條大魚，幾十萬又算得乜吖。對手美聯冇咁大手筆，但亦指令公關部認真工作。代理咁認真都無可厚非，尚悅係近八年元朗區最大型住宅樓盤，對上一個係03年新地Yoho Town。今年又冇乜大盤開售，新地瓏門拖咗幾個月先賣到，暫時沽咗900伙，沽清1075伙可以套現70億，佣金約3億，尚悅沽清有120億，發展商派4億佣金真係濕濕碎啦。