噚日有人力資源公司話本港打工仔工時冠絕亞洲，一周51粒鐘咁大把。Samantha絕不是工作狂，不過身邊朋友每日工時確實唔止10粒鐘，雖然投行唔係人人入得，不過每人都有機會過着投行般冇Life的生活。且看銅鑼灣的Forever 21、旺角的collect point和Gap就明白，在香港打開門做生意，終歸都要「鬥長命」。強國近年要產品轉型都係要「鬥長命」，早前有新聞話大陸電動的士充電後只行到230公里，即係來回香港站到機場3次就Game over，點做生意？所以阿爺要節能「升呢」，第一波加強執法，勒令三成鉛酸電池生產商閂門、五成暫時停產，只有少數企業可以留低，發展緊「鬥長命」電池的超威動力（951），有條件開車。硬着陸今年叫到呼天搶地，超威8月公佈的半年純利仍能賺3.22億元人仔，按年增長127%，研發開支有增無減，按年增加逾1倍。公司開展長壽命高功率電池的研究，若成功研發前景大好。該股昨升3%突破降軌，開車在望。Samantha本欄逢周一、三、五刊出