《NBA中國賽2012》
熱火同快艇周四晚喺北京開始咗中國賽嘅第一戰，雙方今場完全放開懷抱，大打進攻，娛樂現場球迷。苦練「天勾」神技嘅熱火「大帝」勒邦占士，今場落力到爆，得20分助球隊以94:80大勝對手，球迷買貴飛入場抵番晒！
賽前熱火「大帝」勒邦占士，苦練「天勾」絕技，令到好多人圍觀。佢練咗半個鐘，汗流浹背，好似好認真咁。佢同記者話，今年會多啲喺低位搵食。呢位上屆總決賽MVP話：「今年我會多啲喺低位活動，或者我會喺籃底打得更揮灑自如。」睇嚟保殊打中鋒，佢打大前鋒嘅傳聞部署應該係堅。
VIP位炒至1.1萬人仔
聽講今場VIP位炒到成1.1萬人仔，球迷依然走去買，認真瘋狂。不過，可以近距離睇到精采嘅比賽，真係幾貴都抵番。「大帝」話晒今次係人生第9次嚟中國，梗係知道點樣先冧到球迷啦。只見佢第一節開始，已經滿場飛，又飛身背樽補籃，又鏟籃博and one；球迷見到佢攞波，就不停起勢咁叫。比賽打到中場，莫寧、添夏達威同懷斯等5位名宿，仲亮相萬事達中心，同球迷見見面。
快艇新兵冇默契
至於獲迪就真係有出場，不過狀態就麻麻，入樽都炒粉，搞到只可以好尷尬咁儍笑。不過，快艇仲唔掂，一班新兵毫無默契，失誤多多。比歷克格芬俾人睇穿晒，low post轉身完全入唔到鎖匙圈，只係喺快攻時對手唔追，有得入吓樽。佢今場上陣32分鐘得19分，不過有成6個失誤；得分重心失準，快艇大部份時間都係大比數落後。最後熱火以14分大炒快艇，而兩軍球員賽後都留低簽名，難怪現場球迷high爆。快艇下一站（14日）去到上海，真係要生性啲打爭氣波。