已為人妻的歌手陳逸璇（Jolie），試過曾於山上迷路不懂落山，幸好當時她有四頭愛犬陪伴，最終亦是靠牠們，Jolie才得以解困找回行山徑落山，難怪Jolie笑指有四隻愛犬在身邊，感覺就如有四位保安保護自己。
撰文：譚倩宜
養了四隻寶貝狗的陳逸璇（前名陳苑淇），因現時居住的地方較細，故只能挑選最迷你的芝娃娃Prince跟她同住，其餘的約瑟爹利Bud仔、剛毛獵狐㹴Pocky及唐狗Bingo由父母照顧。雖然未能與所有寶貝狗一同生活，但Jolie每日也會抽時間回外家跟三頭狗狗耍樂，她說：「平時都會帶晒佢哋落街散步，加上家要為嚟緊嘅慈善個唱跑步練氣，所以會同佢哋去行山徑度跑，有佢哋陪住唔會悶之餘，會好似有幾個保安陪住咁安全。」
五歲開始養狗的Jolie，首隻飼養的是約瑟爹利，但由於全家也是養狗初哥，不懂處理狗隻問題，最終愛犬不幸逝世，Jolie說：「就係因為呢個唔好嘅開始，令我哋覺得有需要學下養狗嘅知識，所以自己都特登學有關嘅課程，另外就靠睇一個美國教醫寵物心理嘅節目，學點去訓練、了解佢哋。」
主人霸氣馴狗
Jolie表示訓練狗要耐性外，更要讓牠們見識主人的霸氣：「如果佢哋做錯事，你同佢講BB話：『咁做唔啱，曳曳』，其實狗狗係唔會明，唔知自己做錯，亦唔會理你，但如果你好強咁say no，佢感受到你嘅氣勢，就會知道嗰件事唔做得。」
訪問當日Jolie帶同Prince及Bingo一同前來，雖然Bingo身形比Prince大幾倍，但卻不時被Prince欺負，說到飼養Bingo的因由，Jolie稱一切都是緣份：「當年我有份為愛護動物協會出本鼓勵人領養唐狗嘅書，有日訪問完有養唐狗嘅狗主，返到去協會就見到佢啱啱拯救返嚟嘅Bingo，當時一見到已經覺得好有緣好想收養，於是話畀父母知，佢哋非常贊成，加上Bingo同我啲狗狗夾過又OK，就係咁佢就成為我哋家庭一分子。」
Bingo帶路落山
Jolie指Bingo雖然是四狗之中身形最大，但牠卻是最乖巧的，有時更充當糾察，調停打架鬧事的狗狗。Jolie笑指曾經試過於山上迷路，最後幸得Bingo才找到落山的路：「我哋試過行山時顧住睇風景而唔知行咗去邊，當時我哋同Bingo講叫佢幫手搵路，點知佢真係搵番落山條路！因為我另外一隻狗Pocky年紀都大喇，所以有時行得慢唔見咗佢，都係靠Bingo搵佢返嚟。」
斥虐畜有報應
香港居住環境雖然狹窄，但仍有不少香港人愛養狗作伴，只是香港人多愛買名種犬隻來飼養，甚少會選擇養唐狗，故Jolie呼籲：「其實唐狗都好可愛，佢哋係代表土生土長嘅香港狗，忠心又易養，唔會好似名種狗咁多病痛，當你有事嘅時候又會識幫你救你，唔似芝娃娃呢啲淨係得可愛。」
談及早前出現不少虐畜案，Jolie斥施虐者毫無人性：「絕對可恥，真係唔明點解啲人會做得出，狗仔就好似一家人咁，呢啲人一定有報應。」她又指過往曾有不法分子於行山徑放毒餌毒殺狗隻，Jolie呼籲帶同愛犬行山的朋友要注意：「狗狗唔好亂食嘢，如果佢哋係教唔聽，就一定要幫佢哋戴口罩出街。」