郭富城嘅女朋友熊黛林（Lynn）前日度過32歲生日，但係城城當晚要同梁家輝、楊采妮（Charlie）、李治廷及彭于晏，到灣仔會展出席新戲《寒戰》首映，不過城城就被踢爆前日已經靜雞雞同Lynn喺屋企慶祝。問城城送乜嘢畀女友？佢笑笑口話：「衷心祝佢生日快樂。」又話仲諗緊送乜嘢禮物。
密謀買開篷車
城城日前被人見到去睇車，唔通諗住送車畀Lynn？佢話唔係，亦都唔係買畀自己。一向愛車如命嘅城城話睇中咗架開篷車，如果真係買咗會用自己嘅英文名嚟做車牌。咁究竟送乜嘢生日禮物先？城城笑晒口話：「送友誼永固，友誼長存。」
同場嘅Charlie曾經同黎明（Leon）合作，提到Leon同樂基兒（Gaile）離婚，佢話私下同Leon好少聯絡，就算friend到好似姊妹嘅李心潔同梁詠琪，平時都唔會過問私人事。至於屬Leon公司嘅李治廷就話冇特別覺得老闆心情唔好，大讚佢一向公私分明。有消息話Gaile曾經爆粗彈Leon悶？李治廷話：「我同Leon只係分享工作，私人嘢唔講，而我同Gaile都唔熟，但印象中佢好nice，未聽過佢講粗口。」