一句「瓦努阿圖，我想住嘅地方！」令5歲嘅行行唔單止將本來寂寂無聞嘅太平洋島國唱紅，仲令自己做埋廣告明星，條片sell到強國人之餘，仲令對香港前途冇晒希望嘅本地薑都心郁郁想移民，瓦國唔搵行行做旅遊大使真係嘥晒。見個廣告咁受歡迎，廣告商決定食髓知味，嚟緊1、2月會原班人馬去瓦努阿圖拍多輯廣告。
八方噚日見到行行，果然好精靈活潑，喺後台拎住把紙扇玩catwalk，又重講經典對白，讀緊K3嘅佢仲好坦率同八方講唔鍾意返學，聽講廣告商就係睇中佢有童真、唔老積呢個優點。佢嘅拍檔陳啟泰大讚行行好得意，但一有熟人在場就扭計，一段稿講粒幾鐘都搞唔掂，要清場先得。