非一般港女愛與陽光玩遊戲，大學畢業寧日曬雨淋鋪草皮，也不屑坐冷氣房做OL，白滑美少女曬成黑妹，全因鍾情馬場草地香。24歲的劉潔兒恃着青春無敵，拋開曝曬衰老顧慮，加入女士止步的賽馬會跑道管理部門，與全男班員工齊齊剪草施肥，連在職男士都喊苦，但她勢要成為萬綠叢中一點紅，閃耀草場。記者：趙 琦
「我上年4月入職賽馬會見習跑道主任，負責沙田馬場嘅跑道管理，包括種草、剪草、施放殺蟲藥、施肥同土壤水份測試等，幾乎每日都喺戶外工作，日曬雨淋，夏天大汗淋漓又驚中暑，冬天就寒風刺骨。工作咗一年幾，朋友已經話我曬黑晒，初入職時都會搽防曬，但後來發覺點搽都會曬黑，就索性唔搽，有時連帽都懶得戴。
大學時我修讀地理系，自細已經好鍾意大自然，覺得對住大自然工作，做人冇咁刻板。大學畢業後曾經喺寫字樓做過一年文職，但感覺好悶，但家睇住每條草生長，感覺大自然每一樣嘢都有生命力，亦有好多領悟，發現人類其實好渺小，就算有再高嘅智慧，排水系統再完善，但一場大雨都可能會破壞一切。
兩周前一個賽馬日，原本天氣風和日麗，但突然一場暴雨差啲令賽事中斷。當日暴雨嚟得好急，下一場賽事即將開始，同事同我跑出賽道清理積水，被雨淋到全身濕晒，連頭髮都滴水。
自豪工作媲美男性
家我最滿足係睇到馬匹踩住草地，安全舒適咁完成賽事。雖然辛苦，但返工後發現自己係部門唯一女性，或多或少覺得自豪，因為可以媲美男性。喺男性堆中工作，女性反而有優勢，因兩性思維唔同，我可以帶畀團隊新衝擊，發揮女性良好嘅溝通技巧。見習跑道主任入職人工得萬幾蚊，但我有信心會升做助理跑道主任。」
