就快年尾，好多人開始留意職場情況，諗吓好唔好過年之後轉工。人力資源公司Hudson今年8月訪問咗388個本地僱主，發現40.2%僱主計劃喺第四季增聘人手，較上季37.7%高，大圍情況好似幾好，可惜銀行同金融服務業就相反，有8%僱主打算咳人。睇住港股每日成交同新股上市數目，已經知道今年金融業有幾差，年初以來，不斷傳出投資銀行同證券行結業、裁員嘅消息，所以Hudson話銀行及金融服務業打算第四季咳人，大家都唔會好意外，Hudson上季份報告都係咁講。另一個有意咳人嘅行業就係製造及工業，5.3%僱主打算未來三個月裁員。請人意欲最勁嘅係科技及電訊業，51.2%僱主想請人，零售業雖然話增長有放緩迹象，少咗內地自由行豪買，但依然有49.4%僱主打算請人，睇嚟金融界人士可以考慮轉行。