成熟一項推出一項的即興式施政，令梁振英更容易Bypass官僚系統的制約，走民粹之路。在老人津貼提高至2200元爭議中，官僚力撐入息申報制度，但振英及梁粉則認為可以後撤、通派。最終官僚暫勝一仗，但究竟在財委會表決前，會否為令建制派政黨成功爭取而再放寬資產上限，官場中人認為好大機會再放寬，真該煨！
即興模式 冇得試水溫
即興式施政第二個問題係短期行為，冇底線，容易被政黨一步一步剝光豬。政務官本有自己一套應對政黨及民意的期望管理方式，先訂下要守的底線，再以賊佬試沙煲方式，先由常秘層面摸底，慢慢先至由大佬出場。如果早早出大佬，自己會Corner死自己，冇咗Buffer Zone同政黨討價還價。家特首即興模式施政，一出就係大佬，冇得試水溫，亦冇討價還價空間，變了畀政黨剝光豬好機會。過去五年曾朝，夾政府最狠最狼並非泛民，而係工聯會，交津、預算、老人生果金，邊一單唔係工聯會作反帶頭砌政府。如此凶險局面，上屆政府已險象橫生，苦苦支撐。家振英即興派糖，正中下懷，由於欠政治鋪排，通盤計劃，點同議會班老手鬥。至於官僚內部資源分配制度正逐步瓦解，究竟邊一瓣能夠得到特首垂青，變成了內部政治問題。環境、房屋、教育、醫療、發展係梁粉自己人，會否更容易得特首歡心呢，若否，又憑甚麼標準去定優次呢？當政府短期行為主導時，財政紀律更蕩然無存。政府盤數冇可能Case by Case咁睇，一定先靠施政報告以及預算案去做規劃，家所謂決策程序亂Q晒龍，三個月已經出招頻頻，到明年1月施政報告，又要派，2月預算又派，結果全年都在派，仲邊有紀律可言！大家話現屆政府施政亂，未有耐。添馬男